Luke 13

1Da far nyie owuon ifa hilak huwo de ille elimak do honyie hiram no huwo illa Galileya illafa eharrik Pilato hoto nohosie ho hibulucuta hose. 2Etiraŋ Yesu ette hiho dohose, “Egigillo itai hijo agalik hiyette inno Galileya luha hilak daŋ inyeja ne etigiama huwo isieja to hŋikoi ne?” 3Obe, hati elimak naŋ itai, hati lobe itai eyito tere hipalita innahatai, eye iso itai daŋ hiyet nyie.

4Kuya huwo luhe tomon hohotohunik illo Silloma illafa lohuyek amara ette ŋatohoi isieja, egigillo itai hijo ara ifa aheyak ille lagalik huwo illo Yerusalem? 5Obe, ajo naŋ da hatai le be itai ebusak hipalita, elita iso itai iyani.”

6Ette Yesu elimak do hosie hitiriami, “Owuon ifa lobo tihoni iko ŋaboli neledulahini da mana honyie no Fino. Ojo inyeja ette ŋawoŋ ŋariŋari hijo eŋarak bahati haŋer innohonyie hati obe lorrumu hinnak. 7Eijo tihoni lie do haigemani ha mana honyie, toriŋe, ‘ŋasi hunik inno laloce naŋ ariŋari hijo arrumu iso haŋer, arrumu lobe hinnak, tolloŋok ta fau. Ebusak inyie inni nyo hetihara fau?’

8 9Etiraŋ hegiamani hijo ‘ibusak hati hiŋa ille ajo iso naŋ arom oger ehumak tanyan dohonyie.’ Leŋarak haŋer hiŋa nyie ottu, olibo, ojo lobe inyeja alloŋok naŋ da fau.’”

10Etiyana ifa Yesu da Haji Imojit to nabo holoŋ no Sabato. 11Owuon ifa nabo hitonoŋoruo da nafa owuon miniaŋa do honyie innafa etuŋua inyeja ŋasi tomon hohotohunik, ekudura ifa inyeja daŋ obe letiwetik kwan ahide.

12Nafa egonyu Yesu inya, elilloŋ Yesu inyeja ette hijo, “Ahouni iye to hiŋweiti.” 13Ettenyak inyie hani honyie do tihonie ne, ette tihoni nyie tere ette etibisak kwan honyie ahide. Ette inyie hitihabuo Hollum. 14Hati ejoria ifa letaha ho Haji Imojit nyia, nyo etinyarru Yesu to holoŋ no Sabato. Ette hijo do huwo daŋ hijo, “Ara holoŋi inno legiamari ile, ifanu to holoŋitek nuha hotobiaŋa ara to holoŋ no Sabato.”

15Etiraŋ Habu do honyie ette hijo, “Hetimiyahak ho kwaite,” obe lobo tere hatai lohek sigira kuya hiteŋ telerietteri heno hettemat hifioŋ to holoŋ no Sabatoŋ? 16Ara hito inna to woyo na Abramo, efitak Sitan inyeja ŋasi arria, tomon hohotohunik. Hati do honyie ejio itai hotobiaŋa ohehini to holoŋ no Sabatoŋ?”

17Te hijo nohonyie hirro nuha daŋ, ette irri daha luha daŋ illafa ebo hirro innohonyie. Ojo iluluŋ no huwo daŋ omuno hirro inno olibo inne legiem inyie.

18Niye eijo Yesu, “Ara obie no Hollum iya nyoŋ Hati etirijik iso naŋ inyie ho nyoŋ? 19Ara inyie iya ibielu lo bule, neleyari tihoni amana ette ŋebirok da mana honyie, ette ŋesuru yani nahitok ojo cieŋ inno ido ette aduhok hajik innohosie ta tanette innohosie.”

20Enyiak inyeja hijo, “Etirijik iso naŋ obie no Hollum ho nyoŋ?” 21Ara iya bula inne leyari hito noŋoruo ohu eharrek iko hofuo nolocamak to fedito hunik many oreuni luluk.”

22Ohu ifa Yesu loriŋari borejin gala iko missihi inno lowuon de ikoi no Yerusalem ette hitiyana isieja. 23Eijo lobo dohonyie, “Habu, hara huwo illo letihohini iso kaiŋ?” Niya eijo inyeja do hose, 24“Itigiama hafuye te ikat lolotida, nyo ekem hilak hati obe oremik ŋajiŋai.

25Lodiote monye haji ette esionok ikat. De efuo itai weta da bali ette itai hikukuho ikat hijo, “Habu, Habu, hati etiraŋ iso inyeja da hatai.” hijo. “Abe naŋ ayien itai hijo efanu itai.’ 26Ette itai hijo, ‘Edaha iyohooi, ojo emata to hosiere hoi, ojo iye etiyana do koi innohoi.’ 27Hati etiraŋ iso inyeja, ‘Ajo naŋ da hatai, abe naŋ layien hijo efanu itai. Ifeti ade tere hanaŋ, heigiamak irruti!’

28Owuon iso tuari ojo hirrita no hala legonyu itai Abramo, Isako, Yakobo ojo hekilak daŋ do lobie no Hollum, eijo itai ebirohini iso da bali. 29Eba iso huwo te iduoŋi no Holloŋ many to hituli no holoŋ, oko ŋolon ojo telle ho hide ette yiri dee to terefeja no obe no Hollum, 30Hati itiyien inna, ara iso halu hosiere, ojo hosiere ara halu.”

31Kai da halu, afanu hilak illo Farisei ette hijo do honyie, “Woŋ tamanyai inni awak Erode hijo attohoi iye.” 32Eijo Yesu, “Inno ilimak obeyok nyia, ‘towolo efuhai naŋ miniaŋa ojo etilibo huwo te iŋweiti ena iko moite, hati te hitahunihi no holoŋ eba iso naŋ de hicuŋi no igem hanaŋ.’ 33Ta nabo far, lanyarru da hanaŋ haduloi ena iko moite hati do hitarrihi no holoŋ, iya lobe olibo hattohori hekilani tenia ade to Yerusalem.

34Yerusalem, Yerusalem, ille ettohoi hekilak ojo leruoŋo to morru ile lefahu da hatai. Hara holoŋi jai inno lawak naŋ hatubihini durre illahatai iya inna leduduhari hohoro ikiyehi honyie ahotuai hiwa. Hati ebe itai ewak ane. Toriŋai ebusahini haji nohoi. Ajo naŋ da hatai, ibe iso itai egonyu naŋ many eijo, hotowuana jaha do lie lolotu to fure na Habu.’”

35